ពាក្យ​​ “៨ឃ្លា” ​​​​ដែល​អាជីវករ​​​មិន​គួរ​​និយាយ​​​ទៅ​​កាន់​អតិថិជនរបស់ខ្លួន!

ភាសា​ទំនាក់ទំនង​រវាងអាជីវករ ឬអ្នកជំនួញ​ទៅ​កាន់​ដៃគូ​ជា​អតិថិជន គឺ​​ជា​សិល្បៈ​​ដ៏​សំខាន់​មួយ​ជួយឲ្យ​អាជីវកម្ម​​​ទទួល​បាន​ជោគជ័យ​ នៅពេលដែលវា​ត្រូវ​បាន​ប្រើប្រាស់​យ៉ាង​មាន​ប្រសិទ្ធភាព​ ​​​ជះ​ឥទ្ធិពល​ជា​វិជ្ជមាន​​កាន់តែ​ច្រើន​ឡើង​។ ទោះជា​បែបនេះ​ក្តី វា​មិន​ងាយ​ស្រួល​​នៅ​ក្នុង​ការ​កសាង​​នោះ​ឡើយ តែ​វា​អាច​​បញ្ចប់​ទៅ​វិញ​ក្នុង​មួយ​ពព្រិច​ភ្នែក​ប៉ុណ្ណោះ។

ដូច្នេះ​បើ​សិន​ជា​អ្នក​ជា​សហគ្រិន​មួយ​រួប ដល់​ពេល​ដែល​អ្នក​​គួរ​ស្វែងយល់​ហើយ​ថា តើ​ត្រូវ​​​​ជៀសវាង​​​ភាសា​​ទំនាក់ទំនង​​បែប​ណា​​ខ្លះ​ដើម្បី​​ឲ្យ​​អាជីវកម្ម​របស់​ខ្លួន​មាន​ទំនុកចិត្ត​មកវិញ​ពី​អតិថិជន? ខាងក្រោម​នេះជា​​​ពាក្យពេចន៍​​ ៨ ​ឃ្លា ​ដែល​អ្នក​មិន​គួរ​និយាយ​ទៅ​កាន់​អតិថិជន​​ក្នុង​​ភាសា​ទំនាក់ទំនង​អាជីវកម្ម​​ជា​រៀងរាល់​ថ្ងៃ។​​​​​​

១) ពាក្យ​ថា «ទេ!»

សម្រាប់​អ្នក​និយាយ​ទៅ​កាន់​អតិថិជន​របស់​ខ្លួន​ គឺ​ជា​ភាសា​មួយ​ដែល​​មិន​ពីរោះ​ស្តាប់​នោះ​ឡើយ។ វា​ជា​ពាក្យ​មួយ​ខ្លី ហើយ​សាមញ្ញ ប៉ុន្តែ​នៅ​​ពេល​ដែល​វា​ត្រូវ​បាន​និយាយ​ទៅ​កាន់​អតិថិជន វា​ប្រៀប​ដូចជា​​កំពុង​សម្លាប់​ទឹកចិត្ត​អតិថិជន​ដូច្នេះ​ដែរ។

ឧទាហរណ៍​ថា អតិថិជន​ស្នើ​សុំ​បញ្ចុះ​តម្លៃ​បន្តិច អ្នក​មិន​គួរ​និយាយ​ថា «ទេ!​» នោះ​ទេ ទោះបី​ជា​អ្នក​មិន​អាច​លក់​ក្នុង​តម្លៃ​តាម​ការ​ស្នើសុំ​នោះ​ក៏ដោយ។ ការពិត​ ការ​ស្នើសុំ​របស់​អតិថិជន​នេះ​ដើម្បី​ស្វែង​រក​ពី​​តម្លៃ​សមរម្យ​មួយ​​​ទិញ​​​​ផលិតផល​របស់​អ្នក ហេតុ​ដូច្នេះ​បើ​អាច​ទៅ​រួច​​​អ្នក​គួរតែ​​បញ្ចុះតម្លៃ និងស្នើ​សុំ​អតិថិជន​​ដំឡើង​តម្លៃ​បន្តិច​ក្នុង​តម្លៃ​សមរម្យ​ណា​មួយ​ វា​អាច​ជា​ដំណោះស្រាយ​ល្អ​ប្រសើរ​​។

២) «តើ​អ្នក​ប្រាកដ​ទេ?» 

ជា​ធម្មតា​ទៅ​ហើយ​ដែល​អតិថិជន​តែង​​បង្ហាញ​កំហុស​​នៅ​ក្នុង​​​ការ​ស្វែងយល់​ពី​សេវាកម្ម ឬផលិតផល​របស់​អ្នក​ ដូច្នេះ​ចូរ​កុំ​សួរ​ពាក់​មួយ​ឃ្លា​​នេះ​ទៅ​​កាន់​អតិថិជន​វិញ​ឱ្យ​សោះ។ ឧទាហរណ៍​ថាអតិថិជន​ទិញ​កុំព្យូទ័រ​​មួយ​គ្រឿង​យក​ទៅ​ប្រើប្រាស់ ហើយ​អ្នក​សង្កេត​ឃើញ​ថា អតិថិជន​ម្នាក់​នេះ​មិន​សូវ​ស្ទាត់​ជំនាញ ឬមិន​ដឹង​ពី​របៀប​ប្រើប្រាស់​ពី​ផលិតផល​របស់​អ្នក​តែ​ម្តង។

នេះ​ជា​កាតព្វកិច្ច​របស់​អ្នក ​​ដែល​ត្រូវ​ណែនាំ​​ពី​​របៀប​ប្រើប្រាស់​កុំព្យូទ័រ​​ឲ្យ​បាន​ត្រឹមត្រូវ​ម្តង​ជា​ពីរ​ដង កុំ​ឲ្យ​មាន​ការ​ភ័ន្តច្រឡំ​នៅ​ពេល​ក្រោយ។ មួយ​វិញ​ទៀតឧទាហរណ៍​ថា អតិថិជន​ម្នាក់​ទៀត​មក​​​បន្ទាប​ផលិតផល​របស់​អ្នក​ឲ្យ​ក្នុង​តម្លៃ​ទាប​មួយ​ដូច​​ផលិតផល​របស់​ក្រុមហ៊ុន​ផ្សេង​ទៀត​​ហួស​ពី​ការ​រំពឹង​ទុក​របស់​អ្នក។​ តើ​អ្នក​ត្រូវ​ឆ្លើយតប​ទៅ​វិញ​ដោយ​របៀបណា?

ជា​ការ​ពិតដំណោះស្រាយ​មាន​ច្រើន​របៀប​ឲ្យ​តែ​អ្នក​ឆ្លាត​ជាង​នេះ ពោល​គឺ​ត្រូវ​លើកឡើង​ពី​ហេតុផល​គុណភាព ឬសេវាកម្ម​ល្អៗ​មក​បញ្ជាក់​ឲ្យ​ច្បាស់ៗ​កុំ​ឲ្យ​​អតិថិជន​​​មាន​​​មន្ទិល​សង្ស័យ​នាំ​តែ​ខាតពេល និងបាត់​បង់ទំនាក់ទំនង​ជា​មួយ​អតិថិជន​ទទេៗ​នោះ​ទេ។​​

៣) «អ្វី​ដែល​អ្នក​គួរ​ធ្វើ​គឺ​…»

អ្នក​គួរតែ​ស្វែង​យល់​បន្តិច​ថាមូលហេតុ​អ្វី​​បាន​ជា​អតិថិជន​មក​កាន់​ហាង​របស់​អ្នក? ចម្លើយ​នោះ​គឺ​ច្បាស់​ជា​ត្រូវ​ការ​ទិញ​ផលិតផល សេវាកម្ម ឬស្វែង​រក​ជំនួយ​ពី​អ្នក​ជា​មិនខាន។ ដូច្នេះអ្វី​ដែល​ជា​ការ​ចាំបាច់​ និងឆ្លើយតប​របស់​អ្នក គឺ​​មិនមែន​ជា​ការ​បង្គាប់​ឲ្យ​​ពួកគេ​​ត្រូវ​ធ្វើ​អ្វី​ដែល​អ្នក​ចង់​បាន​​នោះ​ឡើយ តែ​​ជា​ការ​ដើរ​តួនាទី​ជា​អ្នក​ផ្តល់​ប្រឹក្សា និងផ្តល់​ជំនួយ​ទៅកាន់​ពួកគេ​ឲ្យ​អស់​លទ្ធភាព​​ដោយ​ការ​គោរព​។

សូម​អ្នកចាំ​ថាជា​គោលការណ៍​ នៅ​ពេល​អតិថិជន​ចូល​មកកាន់​កន្លែង​អ្នក អ្នក​ត្រូវ​ដើរតួ​ជា​​ជំនួយការ​យល់​ពី​តម្រូវការ​របស់​ពួកគេ មិនមែន​ធ្វើ​ខ្លួន​ជា​អ្នកដឹកនាំ​នោះ​​ឡើយ។ នេះ​ហើយ​ដូច​អ្វី​ដែល​គេ​និយាយ​ថា “អតិថិជន​ជា​ស្តេច (the customer is King)” ​នោះ​អី!​​​

៤) «នេះ​​ជា​ការ​ប្រឆាំង​ទៅ​នឹង​គោលការណ៍​របស់​ក្រុមហ៊ុន​យើង!»

សំណើ​របស់​អតិថិជន​មួយ​ចំនួន​​ជៀស​មិនរួច​ពី​ការ​ខ្វែង​គំនិត​គ្នា​នោះ​ទេ ដែល​អាច​នឹង​បង្ហាញ​ពី​ចំណុច​​ផ្ទុយ​គ្នា​ពី​គោលការណ៍​ក្រុមហ៊ុន ឬអាជីវកម្ម​របស់​អ្នក។ ប៉ុន្តែចុះ​បើ​ក្រុមហ៊ុន​របស់​អ្នក​បដិសេធន៍​ទៅកាន់​អតិថិជន​ តើ​អ្នកណា​នឹង​យកចិត្ត​ទុកដាក់​ទៅ​នឹង​សំណើ​របស់​ពួកគេ? ឧទាហរណ៍​ថាអ្នក​​ជា​អតិថិជន​វិញ ទិញ​ផលិតផល​មួយ​ដែល​​​​គ្មាន​គុណភាព ប៉ុន្តែ​មិន​ត្រូវ​បាន​អនុញ្ញាត​ឲ្យ​ដោះដូរ​វិញ​បាន​ឡើយ។ តើ​អ្នក​មាន​អារម្មណ៍​យ៉ាងណា​?

សម្រាប់​សហគ្រិន​ទូទៅ​ បើ​ចង់​អនុវត្ត​គោលការណ៍​នេះ​ទៅ​កាន់​អតិថិជន​ ត្រូវ​តែ​ណែនាំ​ពួកគេ​ឲ្យ​យល់​ពី​គោលការណ៍​លក់​ផលិតផល​​ ឬសេវាកម្ម​​ជា​មុន​សិន​មុន​នឹង​​ឲ្យ​ពួកគេ​ទិញ​ផលិតផល ឬសេវាកម្ម​របស់​ខ្លួន​។ នេះ​អាច​ជៀសវាង​ការ​មើល​មុខ​គ្នា​មិន​ចំ​នៅ​ពេល​ក្រោយ ​ដូច​អ្វី​ដែល​គេ​និយាយ​ជា​រឿយៗ​ថា “លក់​ជើង​ខ្លួន​ឯង”​ នោះ​។

៥) «គ្មាន​បញ្ហា​ទេ!»​​​​

ពាក្យ “គ្មាន​បញ្ហា​ទេ!” ស្តាប់​ទៅ​ហាក់​បង្ហាញ​ទំនុកចិត្ត​ និងប្រាកដប្រជា​ខ្លាំង​ណាស់​ដល់​អតិថិជន​​របស់​អ្នក ខណៈ​ដែល​ពួកគេ​មិន​​ឃើញ​ពី​ចំណុច​​វិជ្ជមាន​ណាមួយ​គួរឲ្យ​ទុកចិត្ត​ពី​ផលិតផល ឬ​សេវាកម្ម​របស់​អ្នក។ នៅ​ក្នុង​អាជីវកម្ម​ភាសា​​ដ៏​សមរម្យ​មួយ​ទៅ​កាត់​អតិថិជន​មិន​មាន​ចរិត ​”ដាច់ខាត” នោះ​ឡើយ ទោះបី​ជា​ចម្លើយ​របស់​អ្នក​ទៅកាន់​ពួកគេ​ជា​វិជ្ជមាន​ក្តី ឬអវិជ្ជមាន​ក្តី។ ជា​ឧទាហរណ៍​នៅ​ទី​នេះ​ស្រាប់ បើ​សិន​អ្នក​យល់​ព្រម​ពី​សំណើ​អ្វី​មួយ​របស់​អតិថិជន ការ​ប្រើ​ពាក្យ “បាទ ឬ ចាស” គឺ​វា​សមរម្យ​ណាស់​​ទៅ​ហើយ។

៦) «ខ្ញុំសូម​ព្យាយាម​ធ្វើ​វា​បន្តិច​សិន!»

​​លទ្ធផលគឺ​ជា​អ្វី​ដែល​អតិថិជន​ត្រូវ​ការ​ពី​អ្នក​ជានិច្ច​ ដែល​នោះ​គឺ​​ប្រាប់​ពី​អ្វី​ដែល​អ្នក​ត្រូវ​ធ្វើ​ឲ្យ​​បាន​សម្រាប់​ពួកគេ។ ពាក្យ “ព្យាយាម” បង្ហាញ​យ៉ាង​ច្បាស់ក្រឡែត​ថាអ្នក​គ្មាន​​ភាព​ប្រាកដប្រជាព្រម​ទាំង​អសមត្ថភាព​​សម្រាប់​ផ្តល់​ទៅ​ឲ្យ​ពួកគេ​ហើយ ហើយ​នេះ​គឺ​ជា​វីរុស​​​បំផ្លាញ​ទំនាក់ទំនង​ និងទំនុកចិត្ត​ពី​អតិថិជន​របស់​អ្នក។

ឧទាហរណ៍​ថា អតិថិជន​ត្រូវ​ការ​​ឲ្យ​អ្នក​​យក​នំ​ Pizza ទៅ​ដល់​គេហដ្ឋាន​របស់​ពួកគេ​​​។ ជា​ការ​ឆ្លើយតប​ដ៏​ប្រសើរ អ្នក​អាច​និយាយ​ប្រាប់​ពួកគេ​ថានឹង​​​បង្គាប់​ឲ្យ​អ្នក​ចែកចាយ​យក​នំ ​Pizza នេះ​ទៅ​ដល់​ដៃ​អតិថិជន​នោះ​​​ក្នុង​អំឡុង​ពេល​​ជាក់លាក់​ណា​មួយ។ ដំបូន្មាន​នៅ​ទី​នេះ អាជីវករ​ទាំងអស់​ត្រូវ​បម្រើ​អតិថិជន​តាម​លទ្ធភាព​ដែល​ខ្លួន​មាន​ មិនមែន​គ្រាន់តែ​សន្យា​ខ្យល់​នោះ​ទ ហើយ​ពាក្យ​ថា “ព្យាយាម​” នេះ​វា​ស្តែង​ចេញ​​​ពី​ការ​​បាត់បង់​ភាព​ជឿជាក់​ទៅ​ហើយ។​​​​​​​

៧) «បើ​មាន​ចម្ងល់​អ្វី​​បន្ថែម សូម​ឲ្យ​​ខ្ញុំ​ដឹង​ផង!»

ក្នុង​ករណី​​មួយ​ដែល​អតិថិជន​មាន​បញ្ហា​​ចូល​​មក​កាន់​ហាង​របស់​អ្នក​ដើម្បី​ជួយ​ស្វែង​រក​ដំណោះស្រាយ ហើយ​អ្នក​បាន​ដោះស្រាយ​បញ្ហា​នោះ​បាន​​យ៉ាង​មាន​ប្រសិទ្ធភាព។ នេះ​ជា​រឿង​ល្អ​បំផុត​មួយ​ក្នុង​កិច្ចការ​អាជីវកម្ម។ ប៉ុន្តែតើ​អ្នក​ប្រាកដ​​ទេ​ថា អតិថិជន​​នោះ​នឹង​លែង​មាន​បញ្ហា​បន្ត​ទៅ​ទៀត​នៅ​ពេល​ក្រោយ? ឬក៏​គិត​ថាពួកគេនឹង​ទាក់ទង​មក​អ្នក​វិញ​បើ​សិន​មាន​បញ្ហា​​អ្វី​ផ្សេងទៀត?

ជា​ការ​ពិត​ការ​បម្រើ​អតិថិជន​ អ្នក​ត្រូវ​ឆ្លើយតប​​​ទៅកាន់​ពួកគេ​​ឲ្យ​បាន​គ្រប់គ្រាន់​តាម​ការ​រំពឹង​ទុក​របស់​ពួកគេ និង​​បញ្ជាក់​ពី​ព័ត៌មាន​​លម្អិត​​ផ្សេងៗ​ទៀត​លើស​ពី​នេះ​ឲ្យ​កាន់តែ​ច្រើន​កាន់តែ​ល្អ ដើម្បី​ជៀសវាង​​មិន​ឲ្យ​ពួកគេ​មាន​ចម្ងល់​នៅ​ពេលក្រោយ​។ នេះ​បង្ហាញ​ថាអ្នក​កំពុង​យកចិត្ត​ទុកដាក់​ទៅ​លើ​ពួកគេ​ និង​កំពុង​​បង្ហាញ​ភាពកក់ក្តៅ​មួយ​ទៅវិញ​ទៅ​មក។

៨) «ខ្ញុំ​នឹង​ត្រលប់​មក​ជួប​អ្នក​វិញ​នៅ​ពេល​ក្រោយ!»​

អតិថិជន​កំពុង​ត្រូវ​ការ​ឲ្យ​អ្នក​ផ្តល់​ផលិតផល ឬសេវាកម្ម​ឲ្យ​បាន​ទាន់ពេល​វេលា តែ​អ្នក​​បែរជា​និយាយ​ថា ​ «ខ្ញុំ​នឹង​ត្រលប់​មក​ជួប​អ្នក​វិញ​នៅ​ពេល​ក្រោយ!» តើ​​នេះ​មានន័យ​​ដូចម្តេច? វា​មិន​បញ្ជាក់​ថា អ្នក​អសមត្ថភាព​ទេ​មែនទេ? ផ្ទុយ​ទៅ​វិញ​ បើ​ដឹង​ថា​ខ្លួន​អសមត្ថភាព​ហើយ ហេតុអ្វី​មិន​និយាយ​ប្រាប់​ត្រង់ៗ​ទៅ?

ឃ្លា​ស្រាលៗ​ខាងលើ​​នេះ វា​មិន​​ឆ្លុះ​បញ្ចាំង​ពី​ការ​សន្យា​ដោយ​ទំនួលខុសត្រូវ​​របស់​អ្នក​នោះ​ឡើយ ត្បិតអី​ពេលវេលា​ជាក់លាក់​មួយ​ក៏​មិន​បាន​​​លើកឡើង​ទន្ទឹម​នឹង​គ្នា​នេះ​ដែរ។ ប្រការ​ដ៏​ល្អ បើ​អ្នក​មិន​អាច​ផ្គត់ផ្គង់​ផលិតផល ឬសេវាកម្ម​បាន​ទេ គួរតែ​និយាយ​ឲ្យ​ត្រង់ៗ​ទៅ ហើយ​បើ​មិន​មាន​លទ្ធភាព​ធ្វើ​បាន​នៅ​ពេល​នេះ តែ​អាច​ទៅ​រួច​​នៅ​​ពេល​ក្រោយ​ គួរតែ​កំណត់​ពេលវេលា​ជាក់លាក់​មួយ​ទៅ ទើប​ធ្វើ​ឲ្យ​អតិថិជន​មាន​ទំនុកចិត្ត​បាន៕