ប្រើ​ច្បាប់​លក់​ 80/20 ​ដើម្បី​ស្វែង​រក​អតិថិជន​​ល្អ​បំផុត​របស់​អ្នក!

អ្វី​ទៅ​ជា​ច្បាប់​លក់​​ 80/20? ​​ប្រហែល​ជា​មានអ្នក​អាន​មួយ​ចំនួន​ធ្លាប់​បាន​ដឹង​ពី​​រូបមន្ត​នៃ​ច្បាប់​លក់​​ដែល​មាន​ឈ្មោះ​ថា​ 20/80។ ​រូប​មន្ត​ចាស់​នេះ​គឺ​បង្ហាញ​ថា​ ២០%​ នៃ​អតិថិជន​របស់​អ្នក​​ ​​គឺ​បាន​ទិញ​​​​ផលិតផល​របស់​អ្នក​ ៨០​%។ ចុះ 80/20 ​វិញ​​មាន​ន័យ​យ៉ាង​ម៉េច? ​ហើយ​ប្រើ​ប្រាស់​វា​យ៉ាង​ម៉េច?

តាម​ពិត​ទៅ​រូប​មន្ត​ 80/20 វា​គឺ​ជា​គោលការណ៍​មួយ​ដែល​គេ​ឲ្យឈ្មោះ​ថា​ គោលការណ៍​ Pareto​ ដែល​មាន​ន័យ​ថា​ ​៨០%​​ នៃ​លទ្ធផល​​ (Outcomes) ​គឺ​កើត​ចេញ​ពី​ការ​ប្រឹង​ប្រែង​ (effort) ​របស់​អ្នក​ ២០%។​ ​​

​លោក​ Perry Marshal ​អ្នក​និពន្ធ​សៀវភៅ​​ ៨០/២០​ ​ការ​លក់​និង​ទីផ្សារ (80/20​​ Sales and Marketing)​ ​និង​ជា​​ប្រធាន​​ក្រុមហ៊ុន​ប្រឹក្សា​យោបល់​​ Perry S. Marshall & Associates ដែល​មាន​មូលដ្ឋាន​នៅ​ទីក្រុង​ Chicago​​ បាន​ចំណាយ​ពេល​ជាង​ ១០​ឆ្នាំ​​ដើម្បី​​យក​រូបមន្ត​​ ៨០/២០​ ​យក​មក​អនុវត្តន៍​​​ក្នុង​ការ​លក់។

​សហគ្រិន​ចង់​បាន​ការ​ផ្គាប់​​ចិត្ត​អតិថិជន​ទាំង​អស់​ពោល ​​គឺ​​មិន​ចង់​ផ្គាប់ផ្គុន​អតិថិជន​មួយ​ផ្នែក​តូច​នោះ​ទេ​ ​ប៉ុន្តែ​សម្រាប់​រូប​លោក​ Perry Marshal ​​ការ​ធ្វើ​បែប​នេះ​​គឺ​ជា​ការ​ខ្ជះខ្ជាយ​ពេល​វេលា​​បំផុត​ ហើយ​សម្រាប់​រូប​លោក ​​រូប​មន្ត​នេះ​គឺ​​ត្រូវ​បាន​ប្រើ​ប្រាស់​យ៉ាង​មាន​​ប្រសិទ្ធភាព​​​​ដើម្បី​ស្វែង​រក​អតិថិជន​ដ៏​ល្អ​បំផុត​ (lucrative customers) ​សម្រាប់​​ក្រុមហ៊ុន។ ​​​​​​​​​ខាង​ក្រោម​នេះ ​​គឺ​ជា​គន្លឹះ​មួយ​ចំនួន​សម្រាប់​អនុវត្ត​ដើម្បី​ទាក់ទាញ​​បាន​អតិថិជន​ល្អៗ​ ឬ​អតិថិជន​គ្រាក់​ៗ​ឱ្យ​មក​ទិញ​ផលិតផល​របស់​អ្នក​៖

1- ​ពិនិត្យ​​មើល​បញ្ជី​​​ឈ្មោះ​អតិថិជន​របស់​អ្នក​៖ ​​​មាន​វិធី​ជា​ច្រើន​ដើម្បី​ពិនិត្យ​មើល​ថា​​តើ​អតិថិជន​អ្នក​ណា​ខ្លះ​ ​​ដែល​​​​មក​ទិញ​ទំនិញ​​អ្នក​ច្រើន​ជាង​គេ ​និង​ញឹកញាប់​ជាង​គេ។ ​ជា​​ធម្មតា​យ៉ាង​ហោច​ណាស់ ​​​​បើ​អ្នក​​គ្មាន​ប្រព័ន្ធ​​កុំព្យូទ័រ​កត់​ត្រា​​ ​ក៏​មាន​វិក្កយបត្រ​​​មាន​ឈ្មោះ​អតិថិជន​របស់​អ្នក​ដែរ។

​​​​អ្នក​គួរ​តែ​សើរើ​បញ្ជី​ស្នាម​ទាំង​នេះ​ រក​មើល​ និង​ស្រង់​ឈ្មោះ​អតិថិជន​ណា​ ដែល​មក​ទិញ​ទំនិញ​អ្នក​ញឹក​ញាប់​​ ឬ​ទិញ​ច្រើន​ ឬ​អាច​និយាយ​ថា​ ម៉ូយ​ធំ។ អ្នក​ទាំង​នោះ​ហើយ​ ជា​ចំណែក​​ដ៏​ធំ​នៃ​ការ​លក់​​របស់​អ្នក។ ​​យ៉ាង​ហោច​​ណាស់​បុណ្យ​ចូលឆ្នាំ​ខ្មែរ​​ ឬ​ចិន​ អ្នក​មាន​របស់​ ឬ​កាដូ​បន្តិច​បន្តួច​​ជូន​ពួក​គេ​ដែរ។ ​

2- សិក្សា​កត្តា​ភូមិសាស្ត្រ​របស់​អ្នក៖ ​​យក​​ផែន​ទី​មក​ពិនិត្យ​​មើល​ និង​សិក្សា​​ថា​តើ​អតិថិជន​របស់​អ្នក​ដែល​មក​ទិញ​ទំនិញ​ញឹក​ញាប់​ ឬ​មក​ទិញ​ច្រើន​​រស់​​នៅ​កន្លែង​ណា។ ​អ្នក​អាច​ពិនិត្យ​​មើល​អាសយដ្ឋាន​របស់​ពួក​គេ​ ​និង​ធ្វើ​ការ​កត់​ត្រា​នៅ​ក្នុង​ផែន​ទី​តំបន់​របស់​អ្នក។

​​ចំណុច​​សំខាន់​នោះ​គឺ​ថា​ ​អ្នក​អាច​កំណត់​បាន​ថា​អតិថិជន​របស់​អ្នក​រស់​នៅ​តំបន់​ដែល​មាន​កម្រិត​ជីវភាព​ខ្ពស់​ ឬ​តំបន់​​ដែល​មាន​កម្រិត​ជីវភាព​ទាប​ ឬ​មធ្យម​ ផល​​ប្រយោជន៍​នៅ​ពេល​ដែល​អ្នក​បាន​ដឹង​ គឺ​ងាយ​ស្រួល​ធ្វើ​​​ផែនការ​អាជីវកម្ម។ ​

ឧទាហរណ៍​ថា​ ​បើ​អ្នក​អតិថិជន​​ស្នូល​របស់​អ្នក​​​មួយ​ភាគ​ធំ​រស់​នៅ​តំបន់​ទីក្រុង​ និង​ជា​យុវវ័យ​ ដូច្នេះ​អ្នក​គួរ​​​បុក​ការ​ចំណាយ​​ផ្សព្វផ្សាយ​ពាណិជ្ជកម្ម​អាជីវកម្ម​របស់​អ្នក​តាម​ប្រព័ន្ធ​អ៊ីនធឺណិត​ (ក្នុង​ទំហំ​ធំ ឬ​ភាគ​ច្រើន) ​ព្រោះ​ថា​យុវវ័យ​​ភាគ​ច្រើន​ចេះ​ប្រើ​បណ្ដាញ​សង្គម។ ​​បើ​ពិនិត្យ​ឃើញ​ថា​ អតិថិជន​មួយ​​ផ្នែក​ធំ​រស់​នៅ​តំបន់​ជាយ​ក្រុង​ ​​អ្នក​គួរ​ធ្វើ​ខិត្តប័ណ្ណ​ ឬ​មធ្យោបាយ​ប្រ៉ូម៉ូត​ដោយ​​ផ្ទាល់​។

3- ​​ស្វែង​រក​ចំណែក​អតិថិជន​របស់​អ្នក​៖ ​អតិថិជន​ដែល​ទិញ​ទំនិញ​ ឬ​សេវាកម្ម​​​ថ្លៃ​ៗ​របស់​អ្នក​ ឬ​អតិថិជន​គ្រាក់​ៗ​របស់​អ្នក​​ គឺ​ច្បាស់​ថាមាន​មួយ​ចំណែក​តូច​ប៉ុណ្ណោះ។ ​ប៉ុន្តែ​លក្ខណៈ​ពិសេស​របស់​អតិថិជន​ទាំង​​នោះ​​ គឺ​ពិត​ជា​​ខុស​ពី​អតិថិជន​​មួយ​ចំណែក​ធំ​របស់​អ្នក។ នៅ​ពេល​ដែល​អ្នក​រក​ឃើញ​បែប​នេះ​ហើយ​ អ្នក​គួរ​​យក​ចិត្ត​ទុក​ដាក់​យ៉ាង​ពិសេស​ចំពោះ​ពួក​គេ។ ​

4- ​បញ្ចៀស​បញ្ហា​​អតិថិជន​របស់​អ្នក​៖ ​ជៀស​មិន​ផុត​នោះ​ទេ​ ដែល​ក្នុង​ចំណោម​អតិថិជន​របស់​អ្នក​ពី​ ១០​ ទៅ​ ២០​​ភាគរយ​របស់​អ្នក​ តែង​តែ​ចង់​បាន​នេះ​​ចង់​បាន​នោះ​ ចង់​បាន​បញ្ចុះ​តម្លៃ​ច្រើន​ ចង់​បាន​ការ​បន្ថែម​ច្រើន​ បើ​ទោះ​បី​ជា​ពួក​គេ​មិន​ទិញ​ច្រើន​ និង​ញឹក​ញាប់​ក៏ដោយ។ ​​ដូច្នេះ​បើ​អ្នក​ចៀស​បាន​ មិន​បាច់​​គិត​ច្រើន​​គឺ​បំភ្លេច​ចោល​ពួក​គេ​ទៅ ​ឬ​ព្យាយាម​កុំ​យក​ចិត្ត​ទុក​ដាក់​ពួក​គេ​ច្រើន​ពេក៕