បើសិនជាអ្នកមាន “៤ចំណុច​នេះ” គ្រប់គ្រាន់​អាច​បង្ហាញ​ថាអ្នក​ជា​បុគ្គលិក​អាក្រក់មួយរូប!

អ្នក​ប្រហែល​ជាមិន​សូវ​បាន​ចាប់​អារម្មណ៍​អំពី​សកម្មភាព​ខ្លួនឯង​ប៉ុន្មាន​ទេ​ថា អ្វី​ដែល​អ្នក​ធ្វើ​កន្លង​មក​ជា​ចំណុច​សំខាន់​ដែល​ឆ្លើយ​តប​ទៅ​នឹង​តម្រូវ​ការ​របស់​ក្រុមហ៊ុនឬអត់។ ដូច្នេះអ្នក​មិន​អាច​​វាយ​តម្លៃ​ថាខ្លួន​ឯង​ជាបុគ្គលិក​ល្អ ឬអាក្រក់​នោះ​ទេ ព្រោះ​អ្វី​ដែល​គេ​ធ្វើ​នោះអ្នក​​ធ្លាប់​អស់​ទៅ​ហើយ។ ដើម្បី​ដឹង​ថាអ្នក​ជា​បុគ្គលិក​ដ៏​អាក្រក់​ម្នាក់មាន​ចំណុច ៤សំខាន់​​ខាង​ក្រោម​ដែល​ត្រូវ​ផ្ទៀងផ្ទាត់៖

១) មក​ធ្វើ​ការ​យឺត (Come late)

វាបាន​ក្លាយ​ទៅ​ជា​ទម្លាប់​អាក្រក់​មួយ​សម្រាប់​បុគ្គលិក​មួយ​ចំនួនក្នុង​ការ​មក​ធ្វើការ​យឺត​ពេល។ ការ​ពិត​ទៅ គ្មាន​នរណា​ម្នាក់អាច​មក​ធ្វើ​ការ​ទៀងទាត់​គ្រប់ពេល​នោះ​ទេ ព្រោះ​ពេល​ខ្លះ​មានធុរៈ​ផ្សេងៗ ឬស្ទះចរាចរណ៍​ក៏​ថា​បាន​ ប៉ុន្តែ​បើ​​មក​ធ្វើ​ការ​យឺត​ញឹក​ញាប់​ពេក​ វា​បង្ហាញ​ថាអ្នក​ជា​បុគ្គលិក​អាក្រក់​មួយ​រូប ព្រោះការ​មកយឺតធ្វើ​ឲ្យ​ការងារ​រាំង​ស្ទះ។

២) ដោះសា​ញឹកញាប់ (Make a lot of excuses)

នៅ​ពេល​ដែល​មាន​បញ្ហា​ម្តងៗ បុគ្គលិក​ភាគ​ច្រើន​ចូល​ចិត្តដោះសា​ តែថាមក​ពី​នេះ​មក​ពី​នោះបានជា​ធ្វើ​ឲ្យ​ការងារ​មិន​អាច​ជោគជ័យ​បាន។ ប្រការ​នេះ​បង្ហាញ​ថា អ្នក​គឺ​ជា​បុគ្គលិក​ដែល​គ្មាន​ការ​ទទួល​ខុស​ត្រូវ​លើ​ការងារ។

៣) ទម្លាប់​និយាយ​ដើម​បុគ្គលិក​ផ្សេង​ទៀត (The habit of gossiping)

អ្នកខ្លះមិន​ពូកែ​នោះ​ទេ​ចំពោះ​ការ​បំពេញ​ការងារ ប៉ុន្តែ​បើ​រឿង​និយាយ​ដើម​បុគ្គលិក​ផ្សេង​ទៀត​វិញ គឺ​ជំនាញ​តែ​ម្តង។ ទម្លាប់​និយាយ​ដើម​អ្នក​ដទៃ​នេះធ្វើ​ឲ្យ​បញ្ហា​ជា​ច្រើន​កើត​ឡើង ជាពិសេស​ធ្វើ​ឲ្យ​បរិយាកាស​ការងារ ស្មុគស្មាញ​កាន់​តែ​ខ្លាំង ព្រោះ​គ្មាន​នរណា​ម្នាក់​សប្បាយ​ចិត្ត នោះ​ឡើយ​ពេល​មាន​គេ​និយាយ​ដើម។

៤) គ្មាន​ការ​លះបង់​ដើម្បី​ក្រុមហ៊ុន​ (No scarification to company )

ជា​ធម្មតាដើម្បី​សម្រេច​ការងារ​ឲ្យ​បាន​ជោគជ័យ វា​ជៀស​មិន​ផុត​ពី​ការ​លះ​បង់​ពេល​វេលា និងកម្លាំងកាយ​នោះ​ទេ។ ដូច្នេះមិន​គួរ​ស្ទាក់ស្ទើរ​ក្នុង​ការ​បំពេញ​ការងារ​នោះ​ទេ បើ​ទោះបីជា​ត្រូវ​ធ្វើ​ការ​លើស​ពី​អ្នក​ទៃ​ក្តី ព្រោះ​វា​បង្ហាញ​ថាអ្នក​ជា​មនុស្ស​ដែល​មាន​ការ​តាំង​ចិត្ត​ខ្ពស់​ដើម្បី​ភាព​ជោគជ័យក្នុង​ការងារ។ ផ្ទុយទៅវិញ បើ​អ្នក​មិន​ហាន​លះបង់​ដើម្បី​ភាព​រីកចម្រើន​នៃ​ក្រុមហ៊ុន​ទេ អ្នក​មិន​អាច​មាន​ឈ្មោះ​ថាជា​បុគ្គលិក​ឆ្នើម​ឡើយ៕